Wat bi ’t Rode Krüz gellen sall

Wecker up ’t Schlachtfeld verwundt ward, för den sall sorgt warden. Dorüm sett sick dat Rode Krüz in ’t Uutland un in ’t eigen Land dorför in, dat dat ierst gor nich sowiet kümmt, dat de Minsch lieden möt. Un wenn ’t doch so is, denn helpen wie em. Wi sünd dor för dat Läben un de Gesundheit un dorför, dat de Minsch acht ’t un iehrt ward. So bringen wi de Minschen vorän, dat se sick bäter verstahn, in Fründschaft tausamenarbeiten un up Duer Freden hollen.

För uns von ’t Rode Krüz is dat ganz egal, tau wat för ’n Staat, Rass’, Religion, Stand oder Partei einer taugehürt. Wi wullen blot dit: de Minschen soväl Hülp gäwen, as se bruken, un de dat an ’n nödigsten hebben, de tauierst.

eder möt Vertrugen tau uns behollen. Dorüm mengt sick dat Rode Krüz nie dortwischen, wenn sick weck in de Wull hebben, wiel dat se politischen oder religiösen Striet hebben oder wiel dat se nah ehr Rass’ oder Gedanken ünnerschiedlich sünd, oder wenn se gor upenanner losgahn.

Jede nationale Rode-Krüz-Gesellschaft richt ’t sick nah de Gesetze in ehr Land un steiht de Behörden bi ehre humanitäre Arbeit bi; liekers sall se eigenstännig blieben, so dat se tau jede Tied so hanneln kann, as ehr dat för richtig un anmäten schient. Un dat heit: unafhängig von all un jeden.

Wecker bit ’t Rode-Krüz-Gesellschaft mithelpt, de deiht dat friwillig un nich för sin eigen Vördeil.

In ein Land kann dat blot eine Rode-Krüz-Gesellschaft gäben. Se is för alle Lüd dor un deiht ehren Deenst överall in ’t Land.

Dat is ein Telt, dat sick weltweit utspannt. Dorünner het jede einzelne Gesellschaft dat glieke Recht as wie de annern, un jede het de Pflicht, de annern tau helpen.